١٩ يوم صيام


اول يوم صيام:

اليوم هو اول أيام الصيام البهائي. الصوم نوعين, الصوم المادي و هو الامتناع عن الاكل و الشرب و الغرائز الجسمانية من شروق الشمس الى غروبها و هذا ما هو الا رمز للصوم الروحي و هو الامتناع عن مشتهيات النفس و الهوى

ثاني يوم صيام: من فضلك لا تتأسف على حالي

اليوم هو اول يوم عمل بعد بداية شهل الصيام #البهائي و لما علم زملائي بأني صائم وجدت نظرة اسى. رغم اني شرحت مفهوم الصيام مصحوباً بابتسامة عريضة و أوضحت لهم قيمته الروحانية بالنسبة لي الا ان حالي صعب عليهم و قدموا الاعتذار كلما تناولوا الطعام امامي

احب اقولهم جميعا, من فضلكم لا تشعروا بالاسى من اجلي, انا سعيد ان أكون صائما و لا ارغب ابدا ان أكون سببا في حزنكم او مضايقتكم.

ثالث يوم صيام:

النهاردة كان يوم مش عادي, اخويا كان على بالي طول اليوم, سواء في الشغل او و انا بدعي و حتى وانا بنيم الأولاد. كان معايا و على بالي. واحشني يا محمود

رابع يوم صيام

ابني (3 سنين) صحي الساعة ستة و نص يقوللي “بابا, انا كمان صايم عشان كده لازم اكل قبل ما الشمس تطلع”

خامس يوم صيام:

النهارده كان يوم مشمس و الجو كان رائع, كان عندي اجتماع على قهوة مع زميلي في الشغل و طلع ما بيحبش القهوة و لما قلتله ان مش هاشرب رحنا سيبنا القهوة و اتمشينا على المينا لمدة ساعة و احنا بنتكلم في الشغل.

سادس يوم “مش” صيام:

انا جبت لعليلتي تسمم غذائي. كنت طبخت اكله من كام يوم و حطيتها في الفريزر. امبارح اكلناها على العشا و ماكانتش اتسخنت كويس. بنتي الصغيرة زي ما يكون كان عندها إحساس و رفضت تتعشا و عشان كده هي الوحيدة اللي بصحتها, و بقيتنا كلنا عمالين نرجع و ما فيناش حيل نعمل أي حاجة.

من رحمة ربنا ان ليس على المريض حرج و معفى من الصوم

سابع يوم صيام

لسه بعاني من الام في بطني من التسمم بس الحمد لله في تحسن كبير. كان غربي قوي اني اشرب مية (عشان اتناول الدواء و اعوض السوائل اللي فقدتها) و في نفس الوقت أكون على وعي بالصيام. حيث ان الصيام ليس فقط بالامتناع عن الطعام و لكنه حالة وجودية و كان الفرد في وضع الصلاة.

ثامن يوم صيام

الحمدلله تعافيت تماما و بدأت صيام تاني. عدد من أصدقائنا و اسرهم قرروا يجوا يفطروا معانا و ما اجمل اللمة. اجمل حاجة كانت لما قعدنا كلنا لقرائة الادعية قبل تناول الإفطار و الاطفال معانا. و يا سلام لما الواحد يشوف طفل جالس بأدب و خشوع يقرأ آيات الله بلحن يطرب الاذان. الحمدلله على اليوم الجميل ده
تاسع يوم صيام

بعد الشغل كان عندي فترة تطوعية كمعالج اجتماعي على الهاتف في لايفلاين. جبت فطاري معايا عشان اكله قبل بداية الفترة بتاعتي و انا باكل جه واحد من المشرفين عشان ياكل عشاه و بدأنا نتكلم. الراجل كان من الأصل الماوري و بدأنا حوار جميل من رحلة للبحث عن الروحانية في الهند الى وحدة عالم الإنساني و ما تعنيه . المناقشة كانت شيقة و ما قطعاش غير ان الفترة بتاعتي ستبدأ. اكيد ها حدد وقت لاكمال الحوار معاه في المستقبل القريب

عاشر يوم صيام

اشتغلت من البيت النهارده عشان ابني حرارته كانت مرتفعة. كان يوم مثمر قوي من ناحية الشغل و انا مرهق قوي دلوقت. النهارده اكدت حجز رحلة سفر للعمل الأسبوع الجاي, و من ساعتها و كل اللي شاغل بالي هو يا ترى هاقدر اصوم و انا مسافر؟ ليس على المسافر حرج و له اعفاء من الصيام لكن انا السنة دي مستمتع جدا بالصيام لدرجة ان صعبان عليا يضيع عليا الكام يوم اللي انا مسافرهم

اليوم الحادي عشر صيام

النهاردة كان تذكرة بأن التطور الروحي هو رحلة و ليس مكان. لسه امبارح كنت بتكلم على قد ايه انا مستمتع بالصيام و مع ذلك النهاردة كنت اشعر بصعوبة التركيز على اني صايم. كان في حاجة مسببالي ضيق و زي ما تكون قدرتي على اني افضل واعي لأني صايم و اركز على المناجاة و الدعاء كانت تحت الاختبار. اجمل حاجة في موضوع رحلة التطور هو اني ممكن استمر في الرحلة برغم الصعوبات

اليوم الثاني عشر صيام

يوم متعب و مثمر في الشغل. الوقت بيعدي بسرعة جداَ. مش فاضل غير أسبوع واحد و الصيام يخلص. كل يوم اسهل من اللي قبله. انا ابتديت اتعود على عدم الاكل و الشرب خلال اليوم, الشمس كل يوم بتشرق دقيقتين متأخر كل يوم عشان انام شوية زيادة, و بتغرب بدري دقيقة او دقيقتين فبفطر بدري. اجمل حاجة حصلت النهاردة كانت مكالمة مع صديقة عن الشباب الناشئ و تطورهم . انا بدعي اني اقدر اقدم أي حاجة في المجال ده من الخدمة

اليوم الثالث عشر صيام

و انا مروح البيت من الشغل كنت بسمع برنامج مسلي على الراديو و كنت بضحك على اللي بيقولوه. وانا سايق و الدنيا زحمة و على وشي ابتسامة عيني جت في عين سائق تاني راح في ساعتها ابتسملي و هز راسه. خلاني افكر, قد ايه ممكن تكون الدنيا حلوة لو كل ما تبص لحد تلاقية بيبتسملك و تبتسمله؟

اليوم الرابع عشر صيام

الليلة اللي فاتت ابني اصر اني اصحيه الصبح عشان ياكل معايا قبل الشمس ما تشرق, و قد كان. ان و هو صحينا الصبح بدري نفطر الساعة 7. و حسيت بقد ايه انا محظوظ اني ابدأ يومي بالشكل ده. بالليل كان عندنا مجموعة من الأصدقاء على الفطار. روح المجتمع و المحبة الموجودة في اللقاءات دي مصدر سعادة ليا

اليوم الخامس عشر صيام

اليوم ابتدى بدري قوي عشان كنت مسافر لسيدني. هناك قابلت ابن خالي و عيلتين من احب سكان سيدني لقلبي, عيلة زين و عيلة السيد. دردشنا شوية وبعدين رحنا نفطر في مطعم على البحر في لابيروز و بعدين رجعنا البيت عند عيلة زين عشان نشرب شاي وضحكنا ضحك ما ضحكتش زيه من فترة. يوم سعيد جداً

اليوم السادس عشر صيام

كان يوم صعب شوية اني اركز على الصيام. و كان عندي اجتماعات كتير و اتكلمت كتير فكنت عطشان. بس عموما لسه فاضل يومين تلالتة على الصيام. هادعي ربنا و اركز على اللي جاي

اليوم السابع عشر صيام

اليوم ده كان احسن من اللي قبله لكنه لم يخلوا من عناصر التشتيت. واحد من العناصر دي هو المنشور اليومي اللي انا بكتبه هنا. كنت بقول لنفسي “مش معقول اقضي يوم تاني مليان تشتيت, انا محتاج حاجة جديدة اكتب عنها” و ابتديت افكر شوية في ازاي ده كان محرك لانشطتي في اليوم ده. انا طبعا ما كنتش متفاجئ لأني عارف نفسي (الى حد ما) و مع ذلك كون اني اعترف و اراجع نفسي في ان المظهر كان محرك و دافع كان موضوع تطور شخصي شيق.

اليوم انتها بافطار مع اختي من اب و ام تانين و اتكلمنا و الكلام ما كانش بيخلص. انا انسان محظوظ ان عندي صديقة بالقرب ده

اليوم الثامن عشر صيام

اليوم قبل الأخير من شهر الصيام, اليوم لم يخلو من مشتتات و مع ذلك كان يوم جميل جدا في الشغل و انتهى بلقاء رائع مع أصدقائي المصريين في سيدني. بكرة ارجع نيو زيلانده عشان احتفل بالنيروز و راس السنة البهائية مع اسرتي. مش قادر استنى

اليوم التاسع عشر صيام
النهاردة بما اني كنت على سفر فلم امتنع عن الطعام. صحيت متأخر شوية و قابلت صديقة ليا على الفطار و دردشنا, بعدها رحت سلمت على عيلة السيد و عيلة زين و طلعت على المطار.
في الطيارة كنت قاعد جنب رجل و زوجته تقريبا في السبعينات من عمرهم و كان شكلهم عسول قوي في خوفهم على بعض و مسكتهم لايد بعض خلال الرحلة
لما روحت البيت ابني كان مبسوط قوي و هو بيوربيني الزينة اللي علقها بمساعدة والدته احتفالا بالنوروز (عيد رأس السنة البهائية) و كان فخور قوي بمجهوده. وانا حسيت قد ايه انا محظوظ ان عندي ابن زيه

عيد النيروز

هو يوم 21 مارس من كل عام, و هو اول أيام السنة البهائية و هو أيضا العيد اللذي يلي الصيام البهائي. اليوم ابتدى و انا و ابني ابتدينا نجهز زواق للكيك اللي هو و مامته عملوه امبارح. و بعد ما زوقناه بكريمة و الوان شيكولاتة و توت رحنا للحضانة بتاعة عشان نشاركهم معانا في الاحتفال. و زياد بكل الفرح قال لمدرسينه نوروز سعيد.

اليوم كان مليان أنشطة عائلية و كان يوم جميل و الجو كان رائع. في اخر اليوم اختي نشرت عن بعض ذكريات اليوم ده معانا من سنين و شريط الذكريات اشتغل و شعرت بسعادة غامرة

ده هايكون اخر منشوراتي اليومية من حلقات الصيام هاجمعهم في مدونة واحدة عشان ابقى اراجعهم في المستقبل. شكرا لكل اللي تابعني سواء من عن بعد او للي علق و اعجب بالمنشورات. انت كنتم صحبتي في الأيام دي

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s